教材分拆扯白旗 跛腳政府冚得旗

教科書年年猛加價,家長年年媽媽聲,港府年年話諗計,於是諗出分拆教材逼書商減價呢條屎橋。好嘞,教育局同書商周旋咗三年,結果點呢?結果係,書商繼續一「本」萬利,當局繼續一敗塗地,家長繼續一肚怨氣,真係吹到啤一聲,叮!

講起分拆教材呢個爛攤子,真係把幾火!蹉跎三年,小部分教材係就係分拆咗,但大部分仍然冇分拆,而就算分拆咗嘅書本,書價不減反加,變相先拆咗教育局個招牌。局長孫明揚被書商剃眼眉,倉卒反擊,單方面宣布書商須繼續免費派發教師用書。書商隨即反面,撤回原定尋日公布嘅新書價目表,仲揚言反價,玩到港府一戙都冇。

港府被書商玩殘,跛腳政府都被人玩慣o架啦,最慘係當局被書商牽住鼻子走,萬一書價飆升,受害嘅又係班家長咋。所以話啫,夕陽政府跛腳無能,何止誤人子弟,直頭誤人全家!

對於書商揚言教科書反價,孫公又點講呢?佢話,以平常心面對書商嘅加價威嚇,如果加幅不合理,不排除公開原本書價喎。咁即係點呀?即係「拆彈專家」無力拆彈,港府扯白旗囉。

叮佢個鎯鎯,教材分拆傾咗三年,如今又返回原點,堂堂政府居然鬥唔過幾間書商,真係講都冇人信。講到呢度,大家知道點解港府急推電子教科書計劃啦,話就話為咗打破書商綑綁式銷售陋習,實際係整色整水。港府無嘢叻,最叻做門面工夫,明知逼書商減價無功而返,咪做場電子教科書大龍鳳轉移視線,敷衍民意囉。

港府咪當市民係三歲細路哥至得o架。正如教育界人士話齋,電子書根本唔可能完全取代傳統印刷書,到頭來家長唔止面對教科書年年加價壓力,更加孭多個電子書開支重擔,百上加斤,苦上加苦。市民有班咁嘅「父母官」,你話係咪三生不幸吖!

一句講晒,港府統籌出書先至係遏抑書價嘅正道,日本同內地可以做到,點解香港做唔到呢?其實,港府唔係做唔到,係唔願做啫。港產官僚卸責成性,又冇膊頭又冇腰骨,咪懶理市民任人宰割,關人個關囉。

唉,一個書價問題,就睇到港府有幾窩囊。遏抑書價係咁,遏抑樓價係咁,焚化爐政策係咁,打擊「雙非」又係咁。曾蔭權上場七年,誤港七年。市民風聲雨聲媽媽聲,聲聲入耳;港府家事國事天下事,事事無成。特衰政府冚得旗嘞,家陣惟有希望下屆政府生生性性,做番齣好戲啦,叮!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報