政壇：政商定格：王以智籌款玩原始RAW味
前滙豐私人銀行亞洲區行政總裁王以智（Monica）淡出金融界後，生活一樣咁精彩，日前佢以演藝學院拓展委員會主席身份搞籌款晚宴，大玩原始「RAW」味。三百幾位嘉賓當晚雲集君悅，但華麗宴會廳內，只見鋪上鐵板嘅十幾張餐枱，枱上卻冇杯冇碟冇刀叉，唔通呢個晚宴冇嘢食﹖
只見近六十個精英學生同畢業生載歌載舞，睇騷半粒鐘後，至見侍應逐一為賓客端上鐵盒，內有精緻美食，包括魚、牛肉、蘋果批同雪糕等。籌款風格咁別致，當晚輕易就籌得九百多萬元。代理多個名錶同珠寶品牌嘅保良總理陳正欣，帶頭捐一百萬元。穿針引線嘅，原來係前民政事務局常秘李麗娟細妹李桂蘭。
王以智（左一）輕易籌得逾九百萬元，陳正欣夫婦（左三及左二）同李桂蘭（右一）都戥佢開心。（被訪者提供）
半小時後，鐵盒美食終於奉上。
晚宴開始時，餐枱上空無一物，「RAW」味十足。