政壇：政商定格：徐燦傑撈過界代理咖啡燕窩
香港大學電子金融服務榮譽助理教授徐燦傑（Jeslie）活躍於金融界，但近期股友睇多過買，佢索性撈過界，雙線發展咖啡同燕窩批發代理。Jeslie同幾位拍檔合資成立咗一間名為「女人魅」（F Generation）嘅公司，做網上金絲官燕買賣，又做埋生麝香貓咖啡（俗稱貓屎咖啡）批發等，希望可以喺年半至兩年內回本。
做嗰行必須識嗰行，佢早排就專程去印尼雅加達，向一位喺峇里W Hotel工作嘅知名咖啡專家學師，又同佢走訪當地近10間咖啡店，學習揀選同品評咖啡嘅技巧，十足十「金融界陳豪」，佢依家仲每朝飲一杯自己沖嘅無糖無奶貓屎咖啡添。
徐燦傑埋頭鑽研印尼咖啡，為自己嘅新生意打拚。（資料圖片）
