政壇：搞搞政：煲呔曾龜速拆彈亂咁噏

過去一個禮拜，政壇風起雲湧，立法會審議議員出缺安排陷於無日無之嘅拉布戰，會議不足法定人數搞到流會；而特區第二把交椅、政務司司長林瑞麟又講明七一後唔撈，政壇鬧哄哄，偏偏聲言六月三十號前佢話事嘅煲呔曾就潛晒水，龜縮到尋日至慢三拍回應事件，等佢拆彈真係炸死都未等到！

上禮拜四立法會流會後，做事快狠準嘅候任特首梁振英喺流會翌日立即開腔，對事件表示關注外，又話香港唔應該再蹉跎歲月，急市民所急。現任特首曾蔭權爵士就影都冇，直到尋日，佢先喺個龜殼度伸個頭出嚟，扮吓嘢顯示仲係佢話事。

講到大家最關心嘅立會拉布戰，煲呔曾只係暗批拉布唔啱，指人民力量議員對出缺安排有不滿，應該以投票呢種遵從「大眾服從小眾」精神嘅方法解釋。民主制度好似係少數服從多數噃，煲呔曾亂噏一通，仲要將「小眾服從大眾」掉轉嚟講，真係唔知佢專登搗亂定暗撐拉布。

不過，煲呔曾暗撐拉布都有理由o架，事關立法會主席已經批咗二十三個議員聯署嘅彈劾貪曾議案，排咗期喺下禮拜三提出，煲呔曾可能以為拉布可令佢避過彈劾呢！