政壇：林D9Eva體面離官場

梁朝新班子嘅籌組工作已進入尾聲，五司十四局新架構傳聞人選亦大致敲定，縱有內地對「乳豬全體」、平穩過渡的指示，現屆政府中，依然有現任官員想走、欲留，只係去留之間有多少屬心甘情願、多少屬時局需要，相信只有當事人知道。不過，官場中人向有「贏得身前身後名」嘅古老傳統，所以一眾要起身嘅官員，由林瑞麟（林D9）到鄭汝樺（Eva）都有一個漂亮嘅原因，雖說「鐵衙門、流水官」係現實，但體面拜拜亦同樣重要。

煲呔曾夏佳理笠高帽

新一屆政府嘅政務司司長大熱人選據傳係現任發展局局長林鄭月娥，林D9名落孫山嘅消息吹咗一段時間，佢日前已高調明志，言明會卸下官職，同太太一齊去英國牛津大學讀書，進修神學。由籌備九七回歸，到特區政府成立之後，就一直官運不俗嘅林D9此番棄官，斷估唔會冇內情，但林D9先談留學，就變咗另一回事。

佢一開腔，官場中人近日就紛紛送上祝福，尋日煲呔曾同行會成員夏佳理更不約而同稱讚林D9喺政府嘅工作好出色，煲呔曾話佢：「無畏艱巨，不屈不撓，係不折不扣嘅出色公職人。」夏佳理就話林D9嘅工作具有挑戰性，任內亦為香港同中央、廣東省嘅關係打下良好基礎。縱使唔留任新政府，林D9面子分都絕對冇輸蝕。

另一個亦好大可能唔留任新一屆政府嘅運輸及房屋局局長Eva，早前已經多番話去留要睇家人嘅決定，意思係佢揀留唔留低，而唔係畀人揀，到咗尋日更拋埋唐詩比喻縱使同一個人、同一個物質，都有唔同形態，睇嚟佢都走硬，不過，走都博得一個重視家庭、關顧親人嘅形象，呢一課係咪應該叫「高官教你如何講拜拜」呢？