霸佔官地無王管 權貴僭建話之你

當官不為民作主，不如回家種紅薯。公僕食民俸祿，理應為民服務，如果尸位素餐，食嘢唔做嘢，咁就愧對市民喇！

審計署早排踢爆大量官地被長期非法佔用，怒轟當局有法不依，執法不嚴。地政總署承認，舊年收到約八千宗霸佔官地投訴，檢控個案僅得八宗，比例係千分之一；而過去四年涉及霸佔官地嘅檢控只有廿一宗，罰款加埋得八萬蚊咁大把。檢控數字九牛一毛，罰款金額若有若無，當局似鼓勵多過打擊，霸佔官地問題有乜法子唔愈嚟愈嚴重吖。

立法會政府帳目委員會尋日討論審計報告踢爆嘅問題，議員炮轟當局嚴重失職，「跨世紀、跨年代」個案數不勝數，要求加強檢控，提高罰則。地政總署仲死撐，話元朗大棠荔枝山莊佔官地個案拖延十八年仍未解決，屬於個別例子，係因為有職員唔按指引做嘢喎。

叮！根本就係狡辯。講真，就算職員跟足指引又點吖，當局根本無心執法，一味拖得就拖。發展局局長林鄭月娥承認，地政總署早喺○四年已經建議提高罰則，但當局話修例費時又複雜，卒之不了了之。

退一萬步講，就算罰則提高咗，當局有法不依，執法不力，咪又係嘥氣。依家最大嘅問題係，高官權貴其身不正，一個二個帶頭違法，而執法部門就側側膊唔多覺，上行下效，有人霸佔官地，有人僭建，睬你都多餘喇！

呢，立法會議員兼東亞銀行主席李國寶山頂豪宅僭建千呎天台屋，擺到明當法例透明，而屋宇署居然隻眼開隻眼閉，兩年來一直玩放生，如果唔係本報踢爆，當局可能仲繼續詐傻扮懵。最離奇嘅係，屋宇署發畀李國寶嘅清拆令竟然寫錯地段號碼，而且錯足一年都冇更改。大家咪以為呢啲係小事吖，根據法例，任何人冇合理辯解而沒有遵從清拆令，可處罰款二十萬元及監禁一年o架。

你話喇，僭建風波搞到滿城風雨，何解李國寶可以若無其事？講到底咪又係官官相衞，官商勾結。係人都知，李國寶同曾蔭權關係密切，煲呔曾、唐英年同「煲呔針」鄭經翰，高官權貴個個僭建，「曾朋友僭建黨」圍威喂，屋宇署又點敢執法吖！

政府有法不依，權貴知法犯法。上樑不正下樑歪，香港綱紀紊亂，亂象叢生，霸佔官地無王管，通街僭建話之你，講嚟講去都係煲呔曾嘅責任。計太一叮話齋，亂源不除，港無寧日，希望下屆政府可以撥亂反正喇！