政壇：護協宣傳片搵索模代勞
公立醫院前線醫護人員壓力好大，香港護士協會近期就發覺多咗護士畀病人無禮對待嘅求助個案，於是趁「國際護士節」拍咗輯名為「互相體諒，愛惜護士」嘅宣傳片，希望病人友善啲，幫手出鏡嘅係靚女model。點解唔搵真正嘅護士出鏡呢？唔通護士唔夠靚女？護協主席李國麟就話：「醫院大把護士靚過佢哋啦！如果去晒拍廣告，咁搵邊個睇住啲病人呀？」
宣傳片中嘅愛心護士就算面對病人諸多要求、呼呼喝喝都保持專業。李國麟話，早年已發現病人暴力對待護士嘅個案增加，甚至有護士曾經畀病人用鹽水吊架扑頭，雖然經反映後個案數字回落，但近排又再回升番，佢希望宣傳片出街後可以減少呢啲麻煩。