政壇:康叔踢醒煲呔曾

立法會審議出缺安排嘅會議流會,衍生候任特首梁振英嘅五司十四局新架構可唔可以喺七一前獲立法會通過、有出世紙誕生嘅大問題,政界議論紛紛,有議員更話現屆政府臨尾至推備受爭議嘅立會出缺安排同版權法,質疑煲呔曾係咪玩嘢?前港區人大兼政壇元老吳康民(康叔)尋日都出謀獻策,認為應該抽起可能拖住新發展嘅草案,讓路畀政府新架構嘅立法工作。

吳康民尋日出席一個公開場合時,講到新架構誕生困難重重一事,佢話,今次嘅架構重組並唔係大調整,而係小手術,只係針對政務司司長和財政司司長工作比較繁忙,增加兩個副手,認為改組建議基本上合情合理。

見溫家寶後更高調論政

佢仲話立法會唔應該過唔到,如果議會夾硬阻撓,甚至會畀公眾一個「故意搗蛋」嘅印象。但係立法會排緊隊嘅條例都唔少,新架構方案仍然有好多風險噃,康叔就建議,立法會議員應該先討論新架構重組,將具爭議性的議題押後︰「依家最緊要係憲制架構放喺第一位,如果認為其他拖住,搞呢個先都係啱。」後邊呢兩句話應該係講畀煲呔曾政府聽,希望現屆政府調整提交法例嘅程序。

康叔踢一踢,唔知煲呔曾政府識唔識郁呢?自從獲國務院總理溫家寶相邀會面後,康叔評論港事更見高調,早排特首選舉時,佢好熱心排陣;到戰事落幕,佢對未來新政府又有唔少睇法,依家再為新架構出世幫把口,可謂用心良苦!

其實,尋日政圈中人好多都關注新架構上立法會嘅時間,建制派同泛民又呈企硬、各說各話姿態,候任特首梁振英日前拋咗句「唔好再蹉跎歲月」,據講,政圈都驚孭上呢一個罪名,嚟緊一個禮拜睇怕事件會有突破性發展。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

設計圖片及對白