議員拉布玩上癮 重組架構有排拗

夕陽政府等收工，家陣更貼切嘅講法係：跛腳政府收得皮！大家睇吓，「特醜」曾蔭權民望又破新低嘞，而佢班庸官手下亦唔好得去邊，推行政策爛尾多過食飯。煲呔曾仲死撐唔認係跛腳鴨，呢啲咪正式係死鴨撐飯蓋囉。

跛腳政府表現令人絕望，咁人稱垃圾會嘅立法會又點呢？都係嗰句啦，一百步同五十步嘅分別咋，立法會保皇黨拂逆民意，否決向貪曾提出嘅不信任動議，是非不分成咁，仲點寄望佢哋為民請命吖？

反對派亦係一擔擔，佢哋最鍾意搞搞震，為反對而反對，就算有利香港嘅事情，一樣唔放過。好似下屆政府重組架構理順施政，相關法案能唔能夠趕及七月一日政府換屆前通過，仲係未知之數，隨時成為政治鬥爭嘅犧牲品。

點解咁講？咁就要睇番立法會現時審議法案嘅情況嘞。嗱，夕陽政府收檔在即，立法會到十月亦要換屆，工作堆積如山千頭萬緒。就講今日恢復二讀嘅議員出缺替補機制吖，有議員提出千幾項修訂，真係聽見都嚇死。而被譏為「網絡廿三條」嘅《版權修訂條例》亦面對相同命運，修訂過千項，草案隨時要押後。

嗱嗱嗱，夕陽議會日子唔多，堆積法案又排山倒海而來，如果真係為民辦事，係咪應該放下無謂爭拗，快刀斬亂麻先？哈，點知下屆政府重組架構建議一出，泛民議員即時玩嘢，又話要諮詢公眾，又話要開會討論，你話係咪存心搞事吖？

叮佢個鎯鎯，立法會無嘢多，懶蟲多，小丑多，政棍多。議員平日唔係蛇王偷懶，就係掟蕉做騷，家陣突然轉死性，又話要諮詢公眾，又話要開會討論，擺明玩拉布，阻撓重組架構，打擊新政府管治威信。

候任特首梁振英表明，如果重組政府架構受阻，將會拖延公屋同居屋等民生政策嘅落實時間。喂，議員是非不分保皇護貪，固然難逃選民懲罰，若然輕重不分損害民生，一樣會受到市民唾棄㗎咋！

一句講晒，議員玩拉布，受害嘅就係普羅市民。如果尊貴議員唔想被人鬧係垃圾，唔想學煲呔曾淪為過街老鼠，咁就咪再玩咁多政治小動作，實實在在為市民做番件好事啦，唔該，叮！