SUN微博：打橫嚟講：教出一班和稀泥國民

近十五年，我一直推動身旁的親友們快快送子女出國讀書，不要再在此地受劣質教育的污染，不特止沒知識、智慧，甚至會愈學愈低能；香港特區教育局就「德育及國民教育科」開記招，看畢他們的課程指引修訂後，更證實我自己的觀點，百分百正確。

老友，唔想你哋啲仔女，變成白癡仔，快閃呀！

去年，此課程指引要小一至小三的學生「認識國家領導人的貢獻」，被人鬧爆後，現居然刪鬼咗，變成毋須必修喎！喂！大佬！國家領導人咁有貢獻，何解唔畀香港細路早日認知，好等佢哋有敬拜心和學習？喂！你哋做得教育局高層，唔多唔少梗讀過兩錢書㗎！畀坊間唔知乜水噏兩句，就漠視引導下一代傾慕國家領導人的心？又置領導人的貢獻無到？點得㗎？在此，公開強烈要求你哋加番入課程裏呀！

現指引也「提示」老師教授具爭議性的課題時，「要求」佢哋保持「中立持平」和「慎選教材」，須用「適當的抽離和投入」手法喎！吓！跟學生傾曾蔭權貪腐時，是否不能用《東方日報》獨家拍攝到佢在澳門出席賭廳夜宴，及瞓遊艇的相片呢？該否「中立地」話唐唐泳池底的地洞，有可能係受人抹黑陷害的呢？提示老師抽離，叫佢哋點敢教「校方唔想出事的議題」吖？

一群和稀泥的教育高層，怎能培育出有思想的社會菁英呢？送仔女走啦！佢哋啲子女走晒嘞！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

email：sunweibo@opg.com.hk

「就係敢爆」網址tv.on.cc/hot