政壇：政商定格：霍啟剛先娶晶晶再上位

作為全國青聯跳板嘅「香港青聯」嚟緊七月換屆，現任主席葉振都功德圓滿，繼任人選按次序應該係常務副主席吳小莉同觀瀾湖太子爺朱鼎健，但傳聞兩人都因為工作太忙，未知會否接棒，剩下來好大機會由霍震霆公子霍啟剛擔任。不過據聞啟剛為迎娶郭晶晶，暫時唔會接任主席。

據可靠消息話，啟剛打算喺今年十一月迎娶郭晶晶，據聞會由原來喺機場亞洲博覽館筵開四百至五百圍，改為在灣仔會展擺近二百圍。大婚當前，試問佢又邊有時間諗競逐青聯主席吖，索性疊埋心水，先修身、齊家，明年再作考慮。又係嘅，啟剛係政壇新星，家底同背景夠晒厚，而且咁後生，打好根基上位，遲吓接埋爸爸霍震霆個立法會議席都唔出奇。

咁講法，主席之位豈不是懸空？非也，據聞青聯高層已有後着，近排密斟葉振都冧莊多做一屆主席，但係咪成事，就要睇葉振都嘅意思喇。