政壇：搞搞政：譚凱邦選立會力求「保本」

喺○八年立法會選舉以一千六百票慘敗、被選舉事務處沒收五萬蚊選舉按金嘅環保觸覺主席譚凱邦，嚟緊九月將會捲土重來，由九龍西轉戰新界西。佢話今次係首次用環保觸覺名義參選，會繼續打正旗號宣揚環保，仲話今次目標係希望唔使被充公選舉按金，甚至爆大冷攞到一席喎。不過，睇嚟就算唔使充公選舉按金，但距離贏到一席嘅票數仲差好遠。

佢話政府近年大力發展新界西，令佢要諗計幫吓啲居民，所以先會轉區參選。今次參選除咗關注環保議題外，佢仲會將本土價值同國民教育等社會議題納入競選政綱，而至今已經籌得約二十五萬元選舉經費，離五十萬元目標金額只約差一半。佢又話由於自己地區樁腳唔夠，會考慮同新民主同盟合作，同埋積極搵新界西區議員支持。

講開又講，新民黨副主席田北辰四年前同譚凱邦一樣喺九龍西參選，今屆兩人又不約而同轉戰新西，唔通譚凱邦有心想狙擊田二少？