政壇：張震遠跟阿媽入籍山東
外界一直以為喺特首選舉期間，出任CY梁振英競選辦主席嘅張震遠同CY都係山東人，但有傳媒報道話張震遠唔係山東人，係湖北人至真，究竟內裏有乜玄機呢？
話說報道指張震遠爹哋張寒松祖籍湖北，生前同國民黨關係密切，走難來港前已有元配叫徐婌妃，來港後再娶祖籍山東嘅二房路蘊真，即係張震遠嘅媽咪，仲話路蘊真係台灣駐港機構、光華新聞文化中心前主任路平嘅堂姊。
尋日我哋搵張震遠求證，佢好大方承認，但亦唔係乜嘢秘密，佢解釋因為爸爸嗰邊少親戚，佢同媽咪嗰邊嘅親朋戚友熟啲，亦較受媽咪影響，所以佢視自己係山東人，況且佢從來冇講過佢爸爸係山東人喎。照咁睇，話張震遠係山東人都唔錯得晒，事關佢確實有一半山東人血統嘛！
張震遠承認有一半山東人血統。（資料圖片）