政壇：白姐姐唔講參選教護腸
立法會旅遊界議員謝偉俊同「白姐姐」白韻琹日前出席公開活動，白姐姐就教大家要重視大小腸嘅護理，謹記食嘢七分飽，唔想有肚腩就千祈咪飲凍嘢喎！點解？事關人體嘅腸好長，食物落到大小腸需要一段時間，所以食到七分飽就啱啱好。如果經常食得太飽，好容易有宿便喺體內散發毒素，令致癌機會大增。
白姐姐仲傳授減肚腩妙方畀城中貪靚女士，就係戒飲凍嘢喇！因為當凍冰冰嘅飲品落到腸度，腸壁會分泌含有脂肪成分嘅黏膜，長此以往，黏膜愈積愈厚，咪有肚腩仔囉！此外佢仲勸大家唔好太執着，保持心情開朗、豁達，唔好成日鬱住鬱住，唔係就好容易有抑鬱症。但被問到會唔會出選立法會超級區議會，佢就窒窒吓，話仲未諗喎！