政壇：蒙德揚難忘生米炒飯

「電飯煲大王」後人，信興集團副主席David蒙德揚除咗煮飯叻之外，原來煮餸一樣咁叻。話說以David嫲嫲命名嘅屯門中華基督教會蒙黃花沃紀念小學「信興創意科研工作室」，上星期舉行揭幕儀式，身為主人家嘅David就即場露兩手下廚示範「醬煮鯖花魚」。

為咗味餸見得人，佢事前秘密練兵，當日亦帶備清酒、味醂、豉油、電飯煲同日本米到場，等大家食魚送飯。至於一班小學生就用傳統「狗仔粉」回禮，即係用湯嚟煮嘅白麵條，再撈上菜脯及豬油渣等配料，食落香口又美味。

其實David幾歲大就好鍾意下廚，最難忘係第一次炒飯唔知道啲飯要煲熟先至可以炒，結果變成雞蛋炒生米，食嗰時仲奇怪點解啲飯咁硬喎，笑到佢媽咪碌地咁滯。同場仲見到全國人大代表曹宏威，講起下廚佢都有件趣事，話說當年佢喺外國讀書時同台灣人同房，一人負責煮一日飯，有日煮黃牙白炒肉片，因為掛住傾偈而落多咗鹽，最後要落糖中和啲鹹味喎！