政壇：陳維安過檔惹議員反彈

立法會秘書長吳文華今年九月約滿走人，開始逍遙嘅退休生活，負責接佢棒嘅人選出現戲劇性變化。前排我哋都報道過，教育局副局長陳維安將會過檔立法會，成為一人之下、萬人之上嘅秘書長，但唔少立法會中人都對佢咁樣過檔頗有微言，睇嚟佢過檔後真係要醒醒定定做人。

傳撼低邱副等對手

陳維安做咗副局長幾年，成績「有目共睹」喇！未上場已被人鬧人工過高，跟住被爆係貪曾智囊、智經研究中心嘅研究小組召集人；到上咗場，又被人質疑佢太太無視人類豬流感肆虐校園期間嘅停課令，接住仲被家長鬧爆佢送囝囝讀國際學校，唔撐本土教育。基本上，陳維安個底花到七彩。

可能做官被人鬧得多，所以陳維安把心一橫跳槽立法會，據聞連運輸及房屋局副局長邱誠武都有份跳槽，仲同陳維安雙雙進入秘書長最後四強，兩人真係心有靈犀。最後陳維安撼低邱副、現職立法會助理秘書長嘅林鄭寶玲，同埋另一位神秘應徵者，成功減人工做秘書長，依家只差一啲例行手續就成事。

陳維安做秘書長差不多係既定事實，立法會中人就有唔同睇法，有啲覺得佢可能為秘書處帶來新氣象，有啲就擔心佢唔熟議事規則同秘書處運作，及唔上林太咁好，但唔同人都一致認為，陳維安過檔肯定會窒礙秘書處內紅褲子出身嘅年輕秘書晉升，尤其現年四十七歲嘅陳維安隨時一做多年，佢一日霸住個位，下面嘅人都好難有機會再上一層樓。

平情而論，做秘書長面對嘅政治問題絕對唔會簡單過做副局，但觀乎陳維安處理分拆教材同教科書及問立法會攞大學三年撥款都搞到一鑊粥，佢嘅政治觸覺可想而知有幾強，如果佢做咗秘書長仲好似做副局咁，怕且秘書處嘅人就唔使驚佢長期霸住秘書長個位，事關佢實聽畀立法會班議員叫佢執包袱走人。