好多名人都百足咁多爪，鋼琴家郎朗琴技精湛外，近期仲主演咗一套3D動畫，名媛鄭詩韻前晚出席香港崇德二社舉行的慈善藝術展覽，就透露正籌備為呢套動畫喺香港舉行慈善首映，佢仲話：「我覺得套動畫適合大人細路睇，入面有十幾首歌，到時郎朗都會嚟香港做宣傳。」
講完工作，話題又去到暑假節目，鄭詩韻話：「我有朋友話要幫小朋友搞好個履歷去考學校，例如去旅行影相都要揀喺歌劇院前面影，我想小朋友去旅行玩得開心，而唔係為滿足學校要求，但其他家長都咁做，令到我好大壓力。」
鄭詩韻忙工作之外，都為暑假節目費心思。
