政壇：搞搞政：任亮憲參選立會變助選

自從桃色事件之後，人民力量嘅「維園阿哥」任亮憲就好似隱咗形咁，風頭亦被人民力量另一位新星黃洋達蓋過，九月立法會選舉在即，人民力量決定唔會畀任亮憲出戰，黃毓民尋日已經證實呢個決定，仲話見到佢去台灣旅行吃喝玩樂啲相咁開心，睇嚟唔參選對佢都無乜影響喎。

選舉係每個想從政或喺政壇闖蕩嘅必經階段，舊年區選仲有落場嘅任亮憲點解突然唔選呢？佢仲咁後生，唔係咁早諗半退出政壇吖嘛？事件真係好耐人尋味。我哋尋日搵過任亮憲，佢話雖然唔參選，但都會去新界東同港島區幫其他兄弟助選。

不過，上述兩區都係豬頭骨區，人民力量叫佢去助選，對佢有幾重用，大家有眼睇。另外，人民力量喺新界西部署更加大膽，決定分拆兩條名單，一條由陳偉業領軍，一條由麥業成同李偉儀帶隊，毓民話兩席都可能會贏到，所以先至會咁做喎。