政壇：立會選戰後彭清華「升級」

特首選舉塵埃落定，政圈盛傳中央會因應香港最新形勢調整對港政策，亦會有新一輪人事調動，當中包括預料中聯辦主任彭清華會「升官」，據講甚至會擢升一或兩級，十足攀上高升快車。據極可靠消息講，彭清華原本「夠鐘」返回內地，但依家就會留任到九月立法會選舉後才離任升官，實行「好頭好尾」，而繼任人選則未有定案。

政改一役協調出色

政圈對於現年五十五歲嘅彭清華並不陌生，○三年七一遊行後，中央先後兩次對中聯辦領導層進行調整，其中彭清華就喺○三年年底獲調派來港，以四十六歲之齡成為當時最年輕嘅中聯辦副主任。及後佢喺○七年中共十七大後當選為中共中央委員，至○九年接替高祀仁「坐正」中聯辦主任職務，仕途一片光明，估唔到三年後嘅今日再傳升官。

其實彭清華在港九年期間，曾經歷多個重要時刻，多次向香港社會發表重要講話，代表中央政府對政商界、甚至全港市民發表重要訊息。其中最令人印象深刻嘅係喺一○年，當政改方案瀕臨「破局」時，中聯辦「破天荒」派出副主任李剛同民主黨商討政改問題，最終政改方案獲得通過，避免重蹈○五年政改方案「流產」覆轍，令停滯不前多時嘅政制得到寸進。

另一方面，彭清華在港期間，中聯辦每年都有份促成CEPA補充協議簽署，又經歷多場大型選舉，包括之前特首選舉出現嘅「流選」危機，基本上都能夠順利舉行。不過，九月立法會選舉仲有幾個月就舉行，建制派同泛民主派將會陷入新一輪混戰，患上「政黨恐懼症」嘅本港政商界自然極需有分量人士「維穩」，平衡各方利益。

據極可靠消息透露，彭清華將會繼續坐鎮香港，擔當「有分量人士」嘅角色，確保今次立法會選舉再次有序順利，之後才會功成身退離任升官。至於彭清華「下一站」會喺邊，升到乜嘢崗位同乜嘢層次，相信遲啲自有分曉。