三權齊護淫賤黎 《爽報》行賤三冠軍

淫賤黎最叻誨淫誨盜，壹淫媒專長宣淫販賤，真係唔到你唔服，呢嗱，又攞冠軍嘞！

由十八個團體組成嘅「反色情暴力資訊運動」，由上年底至今年二月訪問咗七百幾名青少年、家長同教師，了解佢哋對五份免費報紙嘅睇法。結果發現，淫賤黎旗下嘅《爽報》一枝獨秀，超過六成受訪者認為，有關報道手法對青少年嘅道德觀念最有負面影響，一成八人認為內容最空洞同簡單。即係話，荼毒青少年，《爽報》認咗第二，冇人敢認第一，叮！

其實，《爽報》何止荼毒青少年，直頭荼毒全港市民。以上調查將「報道誇張失實」、「渲染色情」同「渲染暴力」等項目獨立評分，結果《爽報》全部攞晒最高分！簡單講，《爽報》係行賤三冠軍：最色情；最暴力；最誇張。講真，呢家嘢唔係報道新聞，其實係當奇情小說咁寫。咪話青少年，就算成年人睇得多，唔變色情狂都分分鐘心理變態啦！

《爽報》日日製造道德污染，調查團體大聲疾呼，要求《爽報》減少渲染色情暴力，促請當局嚴厲執法。唉，咪怪太一叮潑冷水，調查團體只係嘥口水。一來淫賤黎行賤為樂，只會變本加厲嘅啫，又點會收手？二來咯喎，係人都知，港英餘孽最鍾意包庇淫賤黎，要求嚴厲懲處《爽報》，咪等於問和尚借梳！

唔係咩？淫賤黎誨淫誨盜荼毒市民，早已引起全城公憤，點解仲可以明目張膽為所欲為？一句講晒：有人包庇囉。梗係啦，壹淫媒違反《淫褻及不雅物品管制條例》過百次，如果影視處同淫審處揸正嚟做，淫媒早就破產執笠啦，仲點可能繼續害人害物！

仲有，《爽報》違例宣淫，其中十一項不雅物品個案被告上法庭結果又被放生，每項罪名輕罰一萬蚊，十一項罪名合共罰款十一萬蚊。犯罪成本低到離譜，咁樣根本唔係懲罰，直頭係變相鼓勵就真！

行政、司法沆瀣一氣，立法會議員亦係同流合污。前排民間團體齊齊操上立法會公審《爽報》，平日道貌岸然嘅大狀黨同埋白鴿黨議員居然唔係裝聾扮啞，就係顧左右而言他，連《爽報》兩個字都唔敢提。無他嘅，淫賤黎係泛民最大金主，呢兩個黨曾經收過二千五百萬元捐款，受人錢財，替人消災，班政棍又點敢同米飯班主過唔去吖？

香港三權護淫，行政放生，司法輕判，立法護航，淫賤黎有乜可能唔淫賤到底，《爽報》又有乜可能唔攞行賤三冠軍吖？多行不義必自斃，呢班牛鬼蛇神搞到香港烏煙瘴氣，係時候同佢哋秋後算帳喇，叮！