SUN世代：珍惜分秒無悔今生

不少人為生存揮汗如雨，介意成敗得失，但Winnie自那天起，有另一番體會。「大家姐兩年前癌症過身。」這趟是她首次近距離接觸死亡，她聲線平緩地道出昇華的姊妹情：「喺佢生命結束前最後四個月，分秒都陪佢過。」她倆笑着向未知世界前進。無可奈何，姊姊先走，令Winnie體會到，下一秒不一定會出現：「我實踐日常教學理論，珍惜分秒，亦唔會執着，如果聽日係死期，我唔後悔，唔會嬲！」

高薪厚待員工

為了活在當下，她努力發展生命的最大可能。身為美容達人，近年她開設零售店，專售她搜羅的天然護膚品牌：「每賣一個牌子前，都要同負責人、創辦人見面，傾吓理念夾唔夾！」另一方面，她亦渴望做個好老闆：「我以前打工啲老闆都麻麻哋，我唔想步佢哋後塵，所以要對員工好啲，例如我舖頭啲sales girl每個月至少有三萬蚊人工，而我助手都超過六萬蚊，我依家養起幾頭家，好想令佢哋學到嘢，生活好啲！」