「電訊魔童」王維基同香港總商會總裁Shirley袁莎妮食晚飯,兩次被傳媒影到,我哋尋日就登咗一輯魔童早前同Shirley喺尖東帝苑酒店撐枱腳嘅相,兩人言談甚歡。咁啱Shirley尋日出席一個公開活動,現場所見佢照樣同與會人士談笑風生,當記者上前問佢有關同魔童飯敍嘅事時,佢就只係笑,冇答到。聞說性格開朗嘅佢仲同問候佢嘅老友講:「係囉,我豬朋狗友多囉。」睇嚟佢嘅心情一啲都冇受事件影響。
袁莎妮避談同魔童嘅飯敍。