政壇：政商定格：王朝白智生品酒嘗苦樂

唔少打工仔都話「做嗰行厭嗰行」，咁老闆會唔會都咁諗呢？最近見到王朝酒業董事局主席兼執行董事白智生，多口問句：「白總，你究竟鍾唔鍾意飲酒o架？」點知佢神色凝重咁話：「飲酒對於我來說是痛苦，但快樂。」

點解個答案咁文藝嘅？原來作為中國三大龍頭釀酒公司之一，王朝雖然舊年業績唔係咁好，但都賣咗5,190萬支酒，產品數目超過100種，包括白酒同紅酒。公司每年都有研發新產品，釀緊嘅葡萄酒又要測試係咪成熟，所以白智生話，作為主席，每日有五、六段時間要試酒，當中仲未計應酬時候要畀面飲兩杯。

試酒唔係我哋所諗咁簡單，只係聞吓香唔香、含喺口腔試味試口感，然後吐咗佢，而係好多時都要吞落肚，測試酒入喉嚨嘅感覺。返工成日飲，白智生話返到屋企唔會主動攞酒飲，不過見住公司改革同成長，都係快樂嘅。佢仲話從飲酒文化睇，飲葡萄酒相對優雅，又係上流社會交往場合必備，所以應該係快樂嘅。