政壇：D姐教學生寫人生劇本

公務員事務局局長「D姐」俞宗怡尋日出席樹仁大學助學金頒獎典禮時，罕有地同學生分享佢嘅人生觀。佢形容未來就好似一道門咁，同學們將來做每一個決定，無論想打開邊一道門，都要堅持自己嘅理想，唔好局限自己嘅人生為「父母嘅續集、兒女嘅前傳，同埋朋友嘅外傳」，要寫好自己嘅劇本，如果唔係，同一條鹹魚有乜分別呀！佢又提醒班同學，要緊記呢個世界門都有分好多種，有推嘅、拉嘅，仲有趟嘅，所以同學們要時刻靈活變通。

D姐之後仲親身示範何謂變通，記者三度追問佢有關當局豁免非香港永久性居民陳冉加入候任特首辦公室嘅事件，佢不但十問九唔應，期間仲拖住上咗年紀嘅仁大校監胡鴻烈做擋箭牌，一邊行一邊叫記者「讓條路畀佢」，話以免撞親老人家。

早喺特首選舉有結果之前，外界已盛傳D姐七一後會退休，唔知呢個係咪佢為自己寫好嘅劇本呢？