東江源頭污染 港府倒錢落海

都話飲水思源，香港人飲東江水，咁東江水嘅源頭喺邊度呢？廣東省？錯！答案係：江西省。

做人唔識飲水思源，忘恩負義當然有問題，不過市民享用東江水時冇飲水思源，未必係壞事，因為當你諗起東江源頭嘅污染情況，隨時乜嘢胃口都冇晒。

東方報業集團記者跟隨環保團體親赴江西省尋烏縣三標鄉，直擊東江源頭污染嚴重。河流沿岸經常堆積大量垃圾，塑膠袋有，洗衣粉袋又有，連化學肥料包裝袋都有，問你服未！

東江係粵港主要飲用水源，源頭居然淪為垃圾崗，水質嚴重污染，禍因顯然係官僚失職，監管不善。

嗱，第一個失職嘅係尋烏縣嘅縣老爺啦。稍稍情有可原嘅係，尋烏縣為保東江水質，已經限制採礦、限制旅遊、限制工業，幾乎犧牲所有經濟活動，結果就係因為窮到燶，連垃圾焚燒爐都被迫關閉，所以居民先至將垃圾隨手棄置河岸。

至於第二個失職官僚咯喎，就係廣東省政府。如果話東江水源受污染，尋烏縣官僚係欲救冇力，咁廣東省就係見死不救。點解？內地有規定，河流下游受益區每年補貼上游地區，鼓勵上游保護水質，浙江省等已經納入試點。江西省年年向廣東省提出擴大試點要求，但一直不得要領，對方反話「尋烏縣水質須達標，方可取得補貼」。喂，如果尋烏縣有能力「保水」，就唔使向你求救啦，九唔搭八！

叮佢個鎯鎯，廣東省唔識飲水思源，唔怪得香港人要年年高價買污水啦。正如環保團體批評，港府買東江水所費不菲，廣東省錢就識袋，嘢就唔做，連撥個零頭出嚟改善水質都唔肯。東江水持續受污染，莫講話分分鐘危及港人健康，就算雜質可以過濾，亦變相加重香港淨化食水嘅成本，港府同倒錢落海冇乜分別o架咋！

係喎，東江源頭受污染，應該仲有第三個失職官僚，呢個就係港府。東江水受污染已經唔係新聞，港產官僚一直闊佬懶理，廣東省梗係學唐唐話齋：吊吊揈啦！

咪話太一叮唔提醒，東江源頭受污染，江西省話無能為力，廣東省又關人個關，港府唔可以繑埋雙手等收工，一定要快快做嘢。坐視東江水污染惡化，小心隨時變成三個和尚無水飲呀，叮！