政壇：政商定格：張婉婷那些年舞會溝仔
為配合九月新舊學制新生同時入學，港大文學院將會搬離本部大樓。尋日港大為大樓搞歡送儀式，揚威國際嘅港產導演張婉婷同羅啟銳都有出席。七十年代喺港大讀心理系嘅張婉婷難忘昔日喺陸佑堂參加聖誕舞會識男仔嘅往事，但大嘆當年喺舞會上只係「得個跳字」，一個男仔都識唔到。
張婉婷憶述，外貌普通嘅男仔通常會喺舞會上主動出擊找尋女伴。佢話自己好快就受到邀請，但當時就會覺得矛盾，擔心拒絕嘅話，其他男仔未必會再邀請佢。佢仲話本部大樓嘅古典氣氛係一個適合讀文學嘅地方，而佢就最鍾意喺庭園走廊同棕櫚樹前搵靈感。
羅啟銳（左）同張婉婷（右）尋日為母校擔任典禮嘉賓，張婉婷仲特意着上長衫，告別有百年歷史嘅本部大樓。