政壇：撐政府釋智慧講佛偈

出家人四大皆空，但寶蓮禪寺住持釋智慧係入世和尚，點可以唔理政治？喺早前嘅特首選舉，作為宗教界選委嘅佢提名咗唐唐，選舉過後，佢尋日喺浴佛節活動表明心迹話撐政府，但又拋低一句，話如果政府唔支持寶蓮寺，就係傻嘅。佛偈講到呢度，究竟係乜意思，唔通要有悟性嘅人至可以明白？

仲記得當年寶蓮寺計劃興建萬佛殿，政府要求寺方補地價五千萬元，結果氣得釋大師要封山七日，好彩最後寺方同政府就土地擁有權用管理權達成共識先冇事。

跟住政府計劃興建昂坪360又有衝突，當時出家人不滿纜車破壞寶蓮寺風水，兼干擾佛門清靜地，釋大師尋日話今時今日嘅候任特首CY梁振英，原來都曾出手調解，原來佢同CY已相識多年。

眨吓眼，萬佛殿快將落成，新官就上場，釋大師仲率先「大和解」，已邀請CY到訪寶蓮寺，但一切要等對方正式上任再算嘞！