政壇：魔童袁莎妮兩度飯局心交

宣布正式加入電視王國大戰後，「電訊魔童」王維基日日成為新聞人物。最近佢仲畀一份報紙影到佢同一位女士到酒店食飯撐枱腳，之後仲送埋人返屋企。但係嗰份報紙走漏眼喇，原來同魔童撐枱腳食飯嘅女士，正正係香港總商會總裁Shirley袁莎妮。我哋仲知道，魔童唔止一次同Shirley單獨食飯，我哋早前都撞過佢哋一次，睇嚟兩人交情匪淺。

上星期三晚上，魔童開車同Shirley去大坑食日本菜，之後仲送埋佢返屋企，非常有男士風度，而且送佛送到西，魔童仲入埋屋，保護佢到最後一刻。魔童嘅公關尋日同我哋講，話王生送完Shirley之後，就即刻離去。

咁餐飯傾咗乜嘢呢，公關就話王生同Shirley識咗好耐，當年唐唐做工商科技局局長，主管電訊廣播事務，Shirley就做唐唐政務助理，所以魔童同Shirley經常因為公務見面，今次只係敍吓舊，王維基唔係要撬走Shirley過檔城電。

疑似秘書忽然加入

不過Shirley同魔童的確係老友，早前我哋就影到佢喺總商會放工後，司機即刻接載佢由金鐘辦公室到尖沙咀帝苑酒店中菜廳食飯，原來佢嗰次又係約咗王維基，兩人喺帝苑軒撐枱腳，仲專登揀咗張開揚嘅枱，完全無話要鬼鬼祟祟咁，非常大方。兩人當晚胃口唔錯，美酒之餘仲有佳餚，酒過三巡後兩人都面紅紅，手舞足蹈咁似乎傾得幾開心。

但食到差唔多尾聲，唔知係咪發現我哋存在，魔童即刻打咗個電話，之後就見到突然有位女士坐低，變成三人共膳，疑似係魔童私人秘書。之後Shirley仲自己走先，魔童就同疑似秘書行另外一邊走。我哋尋日打過電話畀Shirley，佢嘅電話一直飛咗去留言信箱，反而王維基方面，佢嘅公關就同我哋確認咗上星期畀人影到嗰位，的確係袁小姐。