政壇：「星爺」虎視眈眈 傳李國寶唔玩立會

立法會金融界代表「寶baby」李國寶做咗議員二十幾年，一直有傳今屆佢會遇到挑戰者，呢個人就係前立法局議員、中銀高層「星爺」吳亮星。咁啱尋日星爺出席寶蓮寺浴佛節時，即刻被記者問佢幾時進軍立法會，點知佢話自己唔會「挑戰」寶baby，會等到佢唔選，自己至出戰喎！

點解轉口風？星爺話係業界觀察到寶baby可能唔選，而業界又覺得中銀可以派出代表，自己先有意頂上，近期有唔少銀行界人士都叫佢去選喎。但係星爺講到明，如果寶baby唔肯走，佢就唔會主動挑戰。

馬逢國傳挑戰霍震霆

身為建制派嘅星爺咁講，睇嚟佢都覺得寶baby唔選機會極大，否則佢都唔敢跳出嚟話自己想選啦。佢仲話寶baby議會表現唔太差，但係出席率可以改善一下喎。我哋尋日打過畀寶baby，但佢冇聽電話，所以仲未知佢會唔會去選。不過以佢性格，都唔打冇把握嘅仗，如果到時佢唔選，好有可能係怕輸。

至於藝術發展局前主席馬逢國，亦盛傳佢挑戰立法會體育、演藝及文化出版界體育議員霍震霆，但尋日冇人問佢會唔會選立法會，反而問佢係咪做文化局局長，佢就話一向有心服務市民，而會唔會加入政府，要考慮自己有冇能力。咁有冇能力做文化局局長呢？佢竟然話「呢個問題我答唔到」。既然佢唔閂後門，明眼人都知佢好大興趣喇！