謀殺新聞自由 香港死路一條

夕陽政府等收工，不過講到扼殺新聞自由就不遺餘力，嗱嗱嗱，又落毒手嘞！

支聯會舉行「毋忘六四長跑」活動，終點定喺中聯辦，傳媒盡忠職守到場採訪，發現警方喺中聯辦大門之外架起重重鐵馬，仲臨時將對出花槽劃為「警方行動區」。警方只准四間電視台記者進入區內採訪，其他一律被趕到無雷公咁遠，新聞界變相被綁眼蒙耳，失去報道真相嘅自由。幾經交涉警方先至讓步，所有記者可以進入警方行動區。

港府高層貪官化，香港警方公安化，一國兩制名存實亡，估唔到中聯辦門外反而成功落實「一區兩制」。同一個警方行動區，電視台准拍，其他傳媒消失，荒唔荒謬啲呀？港英時代，傳媒真正係無冕之王，採訪通行無阻。想不到回歸之後大變樣，呢度係採訪禁地，嗰度係不准採訪，咪正係香港新聞自由倒退嘅真實寫照囉。

採訪安排「一區兩制」，梗係被人鬧爆啦。警務處處長「禿鷹」曾偉雄仲死撐，否認限制記者採訪，而係為確保公眾安全同秩序喎。記者採訪新聞天經地義，○三年採訪五十萬人上街都秩序井然，今日採訪一單「六四長跑」，會威脅公眾安全？家陣係警方刻意打亂傳媒採訪秩序就真！

咁講啦，上年北大人訪港，警方首創「核心保安區」，成為港府打壓新聞自由嘅恥辱標誌，家陣又以「警方行動區」阻撓採訪，就係一步步扼殺新聞自由嘅有力證據。叮佢個鎯鎯，港府以溫水煮蛙方式慢性謀殺新聞自由，盲嘅都睇到。先係警方、消防、救護陸續「熄機」，截斷新聞界獲取訊息渠道；繼而將「門常開」政府總部重門深鎖，對記者採訪諸多留難；前排政府新聞處發布系統突然「停機」。警方不斷阻撓記者採訪，無非係為咗方便自己友黑箱作業。

點解港府要千方百計扼殺新聞自由，理由好簡單，曾蔭權貪腐醜聞震驚全港，揭發佢嘅就係新聞界，東方報業集團不畏強權，為民口舌，將貪曾嘅嘴臉一一揭破，所以曾蔭權政府咪打壓新聞自由不遺餘力囉。

即係咁，香港所謂三權分立，根本發揮唔到互相監察的作用，家陣全靠作為第四權嘅傳媒監察啲貪官污吏。新聞自由一旦被殺，貪官污吏就會橫行，到時香港死路一條。各位市民唔可以束手待斃，一齊起來，高呼：還我新聞自由，叮！