政壇：政商定格：林大輝愛駒爆冷話轉運
唐唐「家臣」、立法會議員林大輝同家人尋日入馬場，撐佢同太太蘇麗貞匹愛駒「太奇妙」，結果爆冷跑出。愛駒首次奪冠，大輝表現興奮，仲語帶雙關咁話：「做人要向前望，之前係遇到逆境，拉完頭馬就開始轉運喇！」
佢坦言近期面對唔少逆境，老友以為佢呢排會唔開心，事實啱啱相反。佢話「做生意梗有贏有輸，我做廠嘅，由草根階層做起，有咩未見過吖？」仲話人生有唔同階段，以前嘅事告一段落，唔好緬懷、唔好眷戀，呢個服務社會嘅平台冇咗，咪搵過第二個平台囉！咁會唔會競逐下屆立會議席？佢笑笑咁話只喺做咗一屆，有條件連任，當然會繼續做，除非有競爭對手爭贏佢啦！
同場仲見到保良局副主席鄭錦鐘夫婦同剛卸任副主席嘅顏金煒。顏金煒話細仔Martin有加入扶輪社，希望囝囝繼承佢服務社會嘅責任。
林大輝（前左四）同母親（前左起）、姨甥及太太出盡力為靚駒「太奇妙」打氣。
顏金煒（左）入馬場捧老友鄭錦鐘夫婦（右及中）愛駒「享耆成」，佢將轉做保良局顧問。（徐家浩攝）