政壇：搞搞政：周松崗自證 任港交所主席
盛傳港鐵前行政總裁周松崗獲政府「欽點」做香港交易所主席，但由於佢缺乏金融經驗，唔少人都對佢意見多多。尋日喺馬場見到佢，問點睇呢件事，佢笑言自己入港鐵前都係全無經驗，咪一樣勝任，對於有人反對佢出任港交所主席，佢話：「你睇我做成點先啦！」好似做硬呢個位咁喎！
周松崗話都有聽聞外界對自己嘅聲音，亦承認自己較少接觸金融證券交易，但佢過去曾於銀行、保險界工作，又曾任工商業行政總裁十五年，對集資同投資知識可以講係瞭如指掌，唔係門外漢。
佢解釋港交所嘅作用，係給投資者同集資者一個資金交流平台，同畀生意人管理風險嘅平台。呢啲技術層面嘅運作，由港交所管理層負責，而董事局則負責宏觀發展。佢話就算對證券交易生疏，做主席亦冇大礙！
設計圖片及對白