政壇：寄語CY莫變質黑英明寸貪曾
天文台前台長「黑英」林超英一直撐CY梁振英做特首，尋日喺電台節目中講番佢哋嘅相識經過，除英文名縮寫一樣係CY外，大家都係讀英皇書院，又先後做過同學會會長，而且關心基層，價值觀好接近，難怪「雙英」咁合拍喇。但黑英講明已退休，加入新政府嘅機會係零，即係佢哋唔會係工作夥伴。
黑英又提到讀中六時已留意到中一仔CY，唔係因為佢特別高大靚仔或讀書好，而係覺得佢個樣好特別，好似古代人喎。兩師兄弟讀書時冇交往，反而畢業後都有參加同學會，所以先認識同有見面。
正所謂交淺言深，黑英希望CY記住自己嚟自基層，唔好畀特首個位嘅病毒傳染到變咗，擺明寸貪曾變晒質，佢仲希望將來防貪條例可以監管埋特首。