政壇：密函插騰雞美華hea足九年

有封寫畀候任行政長官辦公室嘅投訴信，對象當然係CY梁振英啦，投訴人同時將呢封信畀咗傳媒，好明顯係想引起社會關注，等CY幫手解決煲呔曾在任七年帶嚟嘅殘局，收拾民政署呢個爛攤子。封信話民政總署庸官俯拾皆是，好似某個民政事務專員咁，一九七九年已加入政府，喺依家呢個官階已二十四年，一直冇得升，令人質疑佢能力到底有幾好。

而民政事務專員嘅上司、民政事務總署署長「騰雞美華」陳甘美華（圖）亦唔好得幾多。投訴人話陳太連續做咗民政署署長超過九年，一樣冇得升、冇得調，同其他三、四年就一調嘅政務主任相距甚遠，投訴人質疑，點解佢九年唔使調職呢？會唔會係因為能力欠奉，冇其他政務局肯收留佢呢？呢個謎，相信只有政府可以解答。

民政署嘅最重要功能係幫政府為市民把脈，掌握民意，煲呔曾將騰雞美華擺喺咁重要嘅位，畀佢hea足九年，而政府又唔知、唔理市民嘅生活係幾咁水深火熱，其實係互為因果囉！