政壇：野蠻白鴿立選霸位

各大黨派為九月立法會選舉積極部署，由鐵頭仁做主席嘅白鴿黨尋日開黨團大會討論選舉策略，經投票後決定派出現任立法會議員涂謹申同尹兆堅出戰超級區議會，希望可以利用阿涂嘅知名度，帶早前由街工過檔嘅新人尹兆堅上位，目標係要坐一望二。

該黨選舉委員會話泛民會喺今個月內盡快開會協調泛民超級區議會嘅參選名單，但就明言除咗極其特殊嘅情況外，白鴿黨都唔會更改名單。終於露出狐狸尾巴，擺明係無心同其他泛民黨派協調，即係假協調啫，呢啲真係典型嘅講一套做一套。

根據立會選舉「六四黃金比」嘅定律，泛民應可喺超級區議會入面攞到二至三席。上個禮拜民協已決定派主席馮檢基參選，街工就諗住搵新人黃潤達越級挑戰，而公文袋就傾向派荷蘭籍嘅司馬文落場。但依家白鴿黨一嚟就霸咗泛民兩個位，只會令到其他泛民政黨成功參選嘅機會大減。

建仔派11名單出戰

另外，建仔尋日亦決定派出十一條名單出戰立法會。有傳聞話早年畀黨硬銷入政府嘅「籮底橙」、發展局政治助理張文韜諗住行立會議員陳克勤嘅舊路，喺做完政助後重返民記，九月就會喺九龍西取代副主席李慧琼挑戰直選，而原本係九龍西嘅李慧琼就會取代張國鈞出戰超級區議會。

知情人士仲話，如果想出選嘅係民政事務局政助徐英偉都總算心甘命抵，但可惜嗰個係喺○八年發展局記者會上瞓覺嘅張文韜喎！不過，如果張文韜重返建仔又去選立會嘅話，最大嘅犧牲者一定會係張國鈞。