政壇：SUN人論壇：澳門又派錢

澳門政府真係好鬼豪氣，呢，近日又話要派七千大元，比起一海之隔嘅香港，可說有雲泥之別。

香港特區班高官，平時懶理民間疾苦，庫房年年水浸，官富民窮，本來好應該還富於民，之但係嗰個孤寒財主鬍鬚曾，成日九唔搭八賴三賴四，一時話外圍經濟因素未明朗，一時又話要量入為出、應使則使，查實就係拔一毛以利天下而不為！好　，最後迫不得已派錢，派到心不甘情不願，好似施捨咁，唉，派錢都會派到天怒人怨，一百歲唔死都有新聞！

多得貪曾當道，近年政府總部幾乎成為示威人士勝地，經常要勞煩警察叔叔清場。筆者覺得呢班官真係人頭豬腦，須知道政府總部位處甲級地段，交通又方便，而且旺中帶靜，唔使術士指點，都知道喺裏面工作嘅官員個個發富發貴，貪到盆滿缽滿啦，咁好風水嘅地方，小市民唔去沾吓好運就笨咯。

反正依家警察咁惡，禿鷹一哥又咁無法無天，何不索性將政府總部方圓百里列為禁區，終日實施戒嚴，遇有非我族類擅闖，見人打人，見飛機打飛機，定可洗脫示威之都之污名。

本欄逢星期日見刊。園地公開，歡迎就時事局勢發表意見。請附上個人資料，電郵至sunmanforum@gmail.com