政壇：搞搞政：楊家聲大想頭 倡推夾屋
本港樓市一直發燒，政府遏抑炒風嘅措施似乎都無補於事，日前搞到財爺鬍鬚曾要出口術。尋日房屋協會主席楊家聲出席個電台節目時就建議，候任特首梁振英領導嘅新一屆政府應該恢復「夾心階層住屋計劃」，畀啲中產人士可以買夾屋上車。
政府啱啱先宣布恢復供應居屋，但每年供應量都仲要緊緊捏住，楊家聲呢個時候嗌CY諗夾屋，似乎急進兼大想頭啲噃。不過，楊家聲明顯有備而來，佢話，依家有好多人超越申請居屋嘅資格，但又有置業困難，市場現有九千個夾屋單位，佢認為當局恢復興建夾屋唔會影響地產商建造新樓宇銷售。
佢仲拋出新思維，認為政府起樓唔一定要大屋邨，綜合性單幢式都得o架，居民可自行負責管理、維修同保安，言下之意，係政府唔使憂慮管理嘅問題。
設計圖片及對白