政壇：陳維安fb白字誤人子弟

新一屆政府組班嘅消息滿天飛，其中一個焦點係現任副局長有冇得留低？教育局局長孫明揚健康不佳鐵定要走，佢嘅副手陳維安（Kenneth）有冇得坐正或留低呢？尋日，Kenneth出席一個英語辯論比賽後，拿拿聲寫facebook宣傳吓，點知短短幾十字佢都寫錯兩個白字，搞到畀網民寸爆，質疑專責教育嘅高官誤人子弟，關鍵時刻仲犯咁低級嘅錯誤，Kenneth真係要自省兼揼心囉！

建仔樂意配合CY組班

青協尋日搞咗個英文演講比賽，Kenneth都有出席，佢話以前喺一間重視雙語教學嘅學校讀書，言下之意，應該中英文都好掂。比賽之後，佢隨即喺fb講番件事，點知就露晒底，Kenneth話，個比賽已經「完」滿結束，又講到辯論三大「原」素。留言一出，即刻被網民發現問題，更正佢，活動「完滿」結束應係「圓滿」至啱；至於三大「原素」，則應該係「元素」。

網民質疑佢係學生中文水準低落嘅元兇，又批評Kenneth逗二十幾萬人工管教育，寫fb留言都出事，或者應該話搵人管理fb都搵個有水準嘅啦。衰到咁應，Kenneth都要企定認錯，冇耐就回應：「多謝指教！」並即刻貼出更正版，肯認錯仲好過死撐爛撐。

講開新政府組班，建仔尋日喺深圳搞咗個路向營，二百幾個參加者中包括現任商務及經濟發展局局長蘇錦樑，候任特首梁振英唔肯講組班名單，但就提到下屆問責團隊成員要有承擔、有理念、同政府意向一致，仲要有較高嘅政治同行政工作能力。建仔副主席劉江華話，該黨現有三位黨員喺政府做嘢，嚟緊好樂意配合CY嘅組班工作喎！佢講嘅咪係蘇錦樑、發展局政助張文韜同民政事務局政助徐英偉囉，呢三個高薪人士嘅表現真係見仁見智，但建仔向CY硬銷佢哋玩多轉嘅意圖卻似乎冚都冚唔住。

另外，政圈消息話，CY今個禮拜會見富貴黨，月底再見泛民主派。