政壇：安子介孻孫做A級龍爸
已故全國政協副主席安子介嘅孻孫安宇昭（Andy）快將升呢，事關Andy嘅太太金志芬已腹大便便，五月就會生小龍女，Andy掩不住初為人父嘅喜悅，佢話囡囡嘅英文名叫Audrey Ann，同佢一樣叫「AA」（Andy Ann），但中文名仲未諗掂。
Andy七年前結婚，仲創辦咗結婚網站同雜誌《大日子》，從此打開佢喺數碼世界嘅一片天地。日前佢就以《大日子》行政總裁身份，約會浙江省同鄉聯合會青年委員會一班兄弟姐妹，分享社交媒體同流動資訊嘅新趨勢，場面熱鬧。金志芬同妹妹金志菁一齊撐場，通利琴行總裁李敬天（Frank）都係浙江人，當晚特登搬咗自家代理、價值四萬幾蚊嘅意大利Peecker Sound靚音響去助興。
安宇昭（左二）搞講座，太太金志芬（右二）同姨仔金志菁（右一）現身撐場。左一為浙青常務副主席麥超傑。