政壇：翟紹唐聞律政司長封口
兩位有傳會出任下屆律政司司長嘅大熱人選尋日同場亮相，港區人大代表廖長江同「法律界公職王」翟紹唐不約而同封口，遇到乜嘢有關組班嘅問題都一字不答，夠晒密實。
佢哋都係大專辯論比賽嘅評判，翟紹唐頒獎時透露，佢同今次比賽嘅另一評判、現任大律師公會副主席石永泰，喺一九八三年都做過辯論隊隊員。佢憶述當年電腦仲未普及，辯論內容全靠「食腦」同參考書籍，所以要鬥多論點，依家啲同學一上網就咩嘢資料都搵得到，反而可能因為資料數據太多而忽略咗論點，失卻咗辯論本身嘅趣味性，叮囑各位同學試吓脫離數據去辯論喎。
今次辯題係「自由行對香港利多於弊」，正方為浸大，對戰反方係理大。近年中港矛盾問題咁敏感，大家當然拗到面紅耳赤，尤其講到雙非孕婦來港爭床位，更加句句到肉，比賽最後由理大勝出。
廖長江（左）同翟紹唐（右）齊齊封嘴拒談會否加入政府。