藝人教你快樂妙方

江若琳：「如果你問我，我覺得有啲人會覺得痛苦，可能係對物質有太多欲望，咁樣會容易唔開心。不過都係社會因素造成，例如樓價咁貴，好多市民，無論一生點樣打拚，都捱唔到個安樂窩。至於力抗痛苦嘅妙方，我覺得係唔好太執着。」

諸葛紫岐：「痛苦呢兩個字對我嚟講比較遙遠，好多時啲人痛苦因為壓力大，我一直都好識得調節自己，搵方法去減壓，例如可以去旅行、做spa或者食甜品，就算去山上大叫都係一個減壓嘅好方法，總之盡量釋放負能量，諗多啲正面嘢。」

曾志偉：「開心最緊要係凡事放開，香港人近幾年好明顯唔開心，因為生活環境壓迫，工作壓力又大。所以大家應該放開啲懷抱，凡事都要睇開啲，唔好咁執着。好希望香港人開開心心，寄望新政府可改善香港人依家嘅生活，同令人開心啲。」

譚詠麟：「開心與否係由自己去選擇同決定，點解嗰啲人選唔開心去過？有啲嘢必須睇開啲，唔好樣樣咁着緊，咁樣會好辛苦。我遇到唔開心，咪搵朋友傾吓偈，或者周圍摷嘢食。要將正面訊息灌輸畀痛苦嘅人，鼓勵同支持佢哋囉。」