庸官治港瞌眼瞓 車毀人亡屢斷魂

馬路如虎口，司機揸住軚盤，就等如操控住周邊行人嘅生命安全，大意小小都唔得。就喺尋日，西環東邊街又發生奪命車禍，一部死火重型吊臂貨車由拖車拖走時懷疑吊鈎鬆脫，吊臂貨車沿斜路溜後，先剷上行人路，再衝入雜貨店，造成一死兩傷慘劇。清明啱啱過咗，道路再添新魂，實在令人既心寒又心噏。

心噏嘅，當然係冇人想見到車禍慘劇發生，而心寒嘅，就係肇事路段意外頻生，輪下冤魂不計其數。點解東邊街意外不絕呢？你可以話同特殊地形有關。東邊街又長又斜又窄又滑，道路陷阱危機四伏，早就令駕駛者聞風喪膽。不過，你更加可以話，車禍慘劇不絕，最主要係因為官僚失職。

先唔講運輸署有冇為東邊街改善道路安全，睇番尋日單意外，事發現場嘅交通標誌寫到明，超過十米長嘅車輛唔可以進入東邊街，點解拖車同吊臂貨車會豎行豎過，仲要撞死人呢？署方又有冇做好監管、有冇制訂預防措施呀？歸根究柢，夕陽政府冇心冇肺冇靈魂，施政得過且過，久而久之，東邊街咪變成黃泉路，長命斜變咗奪命斜囉，叮！

話時話，夕陽政府等收工，搞到香港烏煙瘴氣，危機處處，市民何止過馬路要小心，食嘢更加要提防禍從口入。深圳寶安區揭發有黑工場用可致癌物質炮製黑心河粉，工業添加劑有，棄置用油又有，連變質原料都有，真係食你唔死，嚇死你！最恐怖嘅係，部分毒河粉去向未明，有冇流入閣下嘅五臟廟？對唔住，冇人知！

嗱嗱嗱，如果閣下擔心尋晚嗰碟乾炒牛河係毒河粉，有咁嘅反應係正常o架。深圳同香港只係一河之隔，毒河粉流咗入嚟唔出奇，最重要係，負責食物把關嘅食衞局局長周一嶽一向返工處於半昏睡狀態，所以蘇丹紅呀、孔雀石綠呀，以至最近街市湧現嘅「化妝牛肉」，佢都係最後一個知道。如果毒河粉真係一個唔覺意流入香港，分分鐘市民食到入醫院，佢都未知發生乜嘢事。

唉，清明時節雨紛紛，一提港府欲斷魂。講起呢個夕陽政府，講起呢個周一鑊，真係令人神傷，家陣成個香港就好似一架車，被一個瞌眼瞓嘅司機控制，橫衝直撞，隨時車毀人亡。好彩，夕陽政府就夠鐘嘞，煲呔曾同佢班庸官好快就要執包袱走人，家陣惟有寄望下屆政府撥亂反正啦，叮！