政壇：政商定格：唐媽爆料唐唐下周五返港
喺特首選戰中落敗嘅唐英年離港散心，一去就接近一個月，唐媽媽唐尤淑圻尋日爆料，去咗美國探女嘅唐唐，大約會喺下周五（二十日）返港。
一向風騷嘅唐媽媽尋日以紅噹噹裝束現身保良局就職禮，對於愛兒敗選後悲傷灑下男兒淚，唐媽媽似乎並不介懷，仲話：「（對選舉結果）唔失望，無所謂啦，唔使咁辛苦！」講講吓，唐媽媽亦證實自己選舉當日約咗保良中人攻打四方城，但同邊個打就唔肯講喇。喺咁關鍵時刻開雀局，莫非一早打定輸數？唐媽媽答得玄之又玄：「佢哋（雀友）想氹番我開心嘛！」又係嘅，打牌自娛好過站台喊苦喊忽咁傷感啦。
唐媽媽唐尤淑圻（左二）喺特首選舉後瘦咗，又回復爆料本色。