政壇：搞搞政：侯志強怪論撐村民僭建

本月一號起，發展局轄下嘅屋宇署開展僭建村屋申報同執法計劃，局長林鄭月娥亦再三呼籲村民登記，不過，鄉議局尋日開閉門會議討論之後，廿七個鄉事委員會最後決定唔配合發展局嘅登記僭建行動，即係唔鼓勵村民向當局登記，同時鄉議局最快六月亦會就舊屋地嘅問題啟動司法覆核，上水鄉委會主席侯志強會後揶揄當局：「前朝政府縱容咗嘅嘢，今日特區政府要執番前朝嘅嘢，咁不如執埋唐朝嘅嘢啦！」

佢嘅意思係，村屋僭建係一個源遠流長嘅問題，過去嘅港府縱容咗，今日忽然要執番已成事實嘅嘢，必然引發好多爭拗，佢更入肉咁用唐朝嚟比喻咸豐年代嘅事，意思係港府既然要執正村屋僭建，不如執埋唐朝年間嘅事先啦。

呢個看似歪理嘅建議代表住好多村民嘅心聲，不過練過武嘅侯志強深明過剛則折嘅道理，所以佢撐村民利益時，都公道講：「法律當然要守啦，」講到尾村民保家衞村都要爭取社會認同。