政壇：劉健儀直選港島做炮灰

新民黨主席葉劉淑儀盛傳會重返政府，港島區嘅立法會議席又惹紛爭，其中本身循航運交通界功能界別進身立法會嘅自由黨主席劉健儀（Miriam），尋日率先表態話積極考慮轉戰港島區直選，又言之鑿鑿話如果黨主席唔帶個黨走直選路線會畀人恥笑喎。

自由黨一直有意染指較多中產選民嘅港島區，但「蜀中無大將」，樓梯響咗好耐，終於由Miriam挺身而出，不過，能否成功出選又係另一回事，問佢有無被勸退時，Miriam起初笑而不答，仲語帶雙關話預咗做烈士，仲話要戀棧權位就留番喺航運及交通界喎。

如果Miriam真係棄選航運交通界，相信會掀起新一輪惡鬥，因為據聞早年由自由黨過檔經濟動力嘅屯門委任區議員羅煌楓，以及沙田區議會副主席彭長緯都對呢個議席虎視眈眈，如果Miriam真係自殺式衝落港島參選，最終會否兩頭都唔到岸。