政壇：霍建寧交稅二千五百萬

長實、和黃發表年報，有打工皇帝之稱嘅和黃大班霍建寧人工再成焦點，仲令普羅打工仔好眼紅添，由於和黃3G業務續有改善，霍建寧舊年又加薪近一成一，袋超過一點七億元！以標準稅率百分之十五計，佢要交二千五百幾萬銀稅。

不過，長和系舊年盈利都有增長，所有執行董事都有薪加。和黃舊年董事總酬金超過三億八千二百萬元，而霍大班就佔咗近四成半！至於小超人李澤鉅，和黃同埋長建兩份人工，升幅都有近一成七，有近六千六百萬元，喺長實加薪近一成半，袋約五千八百萬，加埋都有近一億二千四百萬元㗎。

而同小超人一樣身兼長實和黃兩邊執董嘅甘慶林，收和黃加長建人工共加超過一成五，收一千七百五十幾萬；响長實就加約百分之五，收約二千萬，共收約三千七百七十幾萬元（註：李澤鉅及甘慶林因身兼幾間公司董事，上述資料未扣除回付總公司金額）。