政壇：貪曾外訪「樂重道遠」

快將終結七年任期嘅煲呔曾臨尾來個遠程外訪，回想佢○五年宣誓就任時，國務院總理溫家寶以《論語》「士不可以不弘毅，任重而道遠」勉之，○七年再同煲呔曾講埋下半句：「仁以為己任，不亦重乎？死而後已，不亦遠乎？」唔知係咪煲呔曾恃住讀過番書，扮唔識《論語》，甚至將「任重道遠」聽錯為「樂重道遠」，即係快樂之道係有咁遠去咁遠，所以執包袱前都要玩盡南半球，仲玩到露出「死而後已」嘅決心。

蠱惑招返港博坐頭等

煲呔曾今次最後一次外訪，兩日前由香港直航新西蘭，然後轉到南美智利、巴西，十一天外訪確係非常罕見。尋日我哋向旅行社查詢有關飛行路線嘅機票價錢，負責人就話咁嘅路線好難提供優惠，單計經濟客位機票，閒閒地都要萬萬聲，如果坐商務位，一般差唔多要近十萬元。

不過，煲呔曾去泰國布吉度假都要坐豪華私人飛機，要佢坐十幾個鐘頭商務客位又邊度有可能吖，加上官式外訪係用公帑埋單，梗係畀十二萬元坐頭等啦！成個行程，淨係煲呔曾夫婦嘅機票費，總共已經使咗二十四萬元，仲未計隨行嘅特首辦官員同G4喎，由於係長途機，佢哋好大機會升格坐商務客位，加加埋埋就要成五十萬蚊喇！

政府新聞稿話，煲呔曾將會喺十七號離開巴西，十九號早上返港，有旅遊業界人士估計，煲呔曾離開巴西後，將會經歐洲，喺德國法蘭克福轉機返港。但咁走法有乜好處呢？原來香港飛奧克蘭嘅頭等位少之又少，例如國泰航空來往奧克蘭嘅機種就全線不設頭等位，至於歐洲返港嘅飛機就相對多啲設有頭等艙嘅機種。換句話講，如果煲呔曾取道歐洲返港，除咗可以舒舒服服坐頭等回程，仲可以早半日返港，代價就係要多三萬多元。

順帶一提，前日煲呔曾離港時，喺機場首度開腔回應前政務司司長許仕仁被廉署調查一事，但政府新聞處就無發出新聞稿，相反候任特首梁振英早上係同一地點回應傳媒提問就有出稿喎，唔知新聞處係咪要配合煲呔曾一齊等收工呢？定係全程投入侍候新主子呢？