烽火台：白鴿黨多偽君子

壹傳媒旗下免費報紙《爽報》大肆宣淫，內容不雅，惹來各界齊聲譴責；之不過，受過淫賤黎大筆捐款嘅白鴿黨，一直對此不聞不問。白鴿黨平時喺議事堂，經常站在道德高地，好有正氣正義咁款，可惜，對淫賤黎的宣淫販賤、荼毒青少年，竟然龜縮成咁，擺明講一套做一套！

聽其言觀其行，白鴿黨自以為「正氣」凜然，開口埋口講「民主」，然而，一個黨失去了求真求實的信念，根本就係一種墮落！

也許為了挽救江河日下的形象，白鴿黨又扮晒衞道之士，就《爽報》宣淫之事向立法會提交意見書，但用字溫文，只係「關注」，連「譴責」字眼都唔敢用，如此整色整水，分明賊過興兵。

立法會喺二月中召開聯席會議討論《爽報》宣淫事宜，大部分團體連珠炮發譴責《爽報》教壞細路，唯獨白鴿黨代表議員全程「齋坐」，好似畀人毒啞咗，代表教育界嘅張文光更粒聲唔出，小生不禁要大聲喝問：有冇搞錯，平時議論滔滔，成個正義戰士，面對大是大非卻變成鵪鶉，真係令人失望！

白鴿黨事隔個多月才「做嘢」，而且顧左右而言他，叫當局唔好以打擊不雅為由干預新聞自由，虛偽成咁，無非係為九月立法會選舉補鑊，不過，觀眾眼睛係雪亮嘅，一個黨有咁多偽君子，點塗脂抹粉都遮唔到醜陋嘅一面！