公僕享侍產假 蟻民望天打卦

香港呢個「示威之都」唔係徒有虛名o架，連請願道具都別具一格。嗱，紙紮棺材、發泡膠公仔就見得多，抬薑醋出嚟表達訴求，你又見過未？

冇錯，尋日有立法會議員同社福機構成員，帶埋產婦坐月必備嘅薑醋踩上社署總部，要求批准社署轄下三百幾個社福機構嘅男員工，可以同公務員一樣享有侍產假，並將有關福利推廣至全港企業。

侍產假呢樣嘢，喺外國早就唔係乜嘢新聞，但喺香港就屬於新鮮事物，可惜咁嘅德政只惠及公僕，其他打公仔無緣享受。呢，今年四月一日起，所有合資格男性公務員同政府僱員，都可以享用五日全薪侍產假。公僕放假湊仔仲有人工逗，唔止羨慕死其他打工仔，更恨死隔籬屋大肚婆，真係同人唔同命，同遮唔同柄囉。

話時話，曾蔭權舊年十月施政報告先至提出侍產假，點知未夠半年已經成事，益自己友嘅效率高到冇人信，唔怪得話香港公務員係「世界一流」咯。

問題係，公僕有着數自己先攞，幾時輪到做「主人」嘅納稅人享受同等待遇呢？公務員可以印印腳歎侍產假，唔通其他打工仔就唔使做老竇？如果社福機構男員工可以同公僕睇齊，其他人只能夠做蜑家雞見水唔飲得，分明係製造不公，分化社會啫。

叮！煲呔曾推行福利政策從來唔係一視同仁，而係親疏有別。公僕高薪厚祿唔使講，升到一定職級就享有房屋津貼，子女去海外升學仲有資助，咁都嫌唔夠，一講到其他福利，樣樣都要優先享受。好似五天工作周咁，又係率先喺政府部門推行，而且話做就做，絕不拖泥帶水，至於點樣擴大到私營企業，當局到依家仲係慢條斯理，關人個關。又譬如內地孕婦來港產子，公務員內地妻子可以優先獲配床位，普通「單非」孕婦莫講話床位要輪候，仲隨時被公院拒收。事實證明，煲呔曾福為民開係假，福為官開至真。

做公僕先天下之樂而樂，永冇蝕底，難為其他打工仔只能望天打卦。無計啦，煲呔曾其身不正，傍住富商攞着數不甘後人，佢嘅手下又點肯蝕底吖。計太一叮話齋，今次有人抬薑醋請願只係警告咋，如果曾濫權繼續福為官開，下次就唔只抬薑醋咁小兒科o架喇，叮！