SUN世代：拉花小王子

「拉花只代表一個完美句號，咖啡本身先係最重要。」二十四歲咖啡師楊曜輝，左手斜斜地拿着一杯Expresso，右手將牛奶慢慢倒入咖啡，牛奶瞬間變成畫筆，在咖啡上畫出美麗拉花圖案。小伙子入行短短兩年，先後在本地及國際的咖啡拉花大賽奪冠，鋒芒畢露，但成名沒令他忘記對咖啡的執着，反而視比賽榮耀如拉花般錦上添花，繼續在咖啡店邊學邊做，追尋咖啡夢。

「我唔係咖啡癡，不過好鍾意咖啡店嘅輕鬆氣氛。」喜歡並不需要原因。中七暑假，楊曜輝在一間咖啡店做兼職，與咖啡初次邂逅，雖未擦出愛火，卻為日後好姻緣埋下伏線。「畢業後喺外資公司做文職，咁啱完contract，又咁啱同之前做part-time識嘅朋友傾開偈，知道有間咖啡舖請人，就去見工。」

面試成功後，他卻收到舊公司電話，說有新工作介紹給他。「可能連個天都想問多我一次，係咪真係想做咖啡？份文職人工係高啲，不過無可能成世人只為錢而工作，何況自己仲後生，值得去做想做嘅嘢。」開設咖啡店，就是楊曜輝想做的事，於是他決定到咖啡店工作，由基本功學起。

初入行的他各類工作都要做，不論是掃地、洗廁所，但偏未有機會接觸咖啡。「我從來無介意，因為無經驗邊有資格介意？每樣嘢都有學習價值，如果連抹枱都唔認真，又點沖一杯好咖啡？」一個月後，他終得償所願，在老闆安排下學習沖咖啡。「我仲記得第一次接order，一邊沖一邊手震。」

留咖啡店苦練到凌晨

當天那雙抖震的手，經過一年多苦練，已達隨心境界，更令楊曜輝在講求手勢穩定的拉花比賽中大放異彩。為吸取經驗，去年他主動參加本港首屆咖啡拉花比賽，「始終好難邊工作邊練習，惟有等收工留喺舖頭練，每日拉五十幾杯，練到凌晨兩、三點先走。」成功需苦幹，勤力小子最終脫穎而出奪冠。上月他又再創佳績，在國際咖啡拉花大賽中，擊敗全球六十三名高手，成為首位華人冠軍。

年少得志帶來的名氣，難免令人沖昏頭腦，但眼前的楊曜輝謙謙有禮，沒有丁點氣燄。在他眼裏，獎項猶如拉花，並不如外界般看重。「咖啡本身、炒豆過程、打奶力度等，會影響拉花效果，拉花唔係最重要，但成功嘅拉花圖案係一杯好咖啡嘅保證。」

「其實我無人哋諗到咁成功，因為成功係由不斷嘅失敗累積而嚟，參賽只為累積經驗。我希望可以將每杯咖啡都維持喺最佳狀態，始終咖啡先至係主角。」說罷，楊曜輝將咖啡杯遞上，臉上掛着他的「招牌笑容」，期待夢想成真的一天。

楊曜輝小檔案

現職：Holly Brown咖啡師

獎項：2011年香港咖啡拉花大賽冠軍、國際拉花大賽New York Coffee Fest冠軍

興趣：旅行、閱讀、行山